მარინა ალექსიძე

მარინა ალექსიძე საქართველოს დამსახურებული არტისტი

დაიბადა 1949 წლის 22 ივნისს თბილისში. 1967 წელს დაამთავრა ვ.ჭაბუკიანის სახელობის თბილისის სახელმწიფო ქორეოგრაფიული სასწავლებელი. (პედაგოგები თ. ვიხოდცევა,  ვ. ჭაბუკიანი), 1975 წელს კი – ი. ჭავჭავაძის სახელობის უცხო ენათა ინსტიტუტის ფრანგული ენის ფაკულტეტი.

1967-1994 წლებში წლებში თბილისის ოპერისა და ბალეტის სახელმწიფო თეატრის საბალეტო დასის წამყვანი სოლისტი იყო.

რეპერტუარი:
კიტრი („დონ კიხოტი“), ოდეტა-ოდილია („გედების ტბა“), მირტა („ჟიზელი“), გრან პა („რაიმონდა“), ბესი („პორგი და ბესი“, მ. ლავროვსკის ქორეოგრაფია), დეზდემონა, ემილია („მავრის პავანა“ ხ. ლიმონის ქორეოგრაფია), კარმენი („კარმენ-სიუიტა“  ალონსოს ქორეოგრაფია), სოლო პარტიები ჯ. ბალანჩინის ბალეტში  „სერენადა“, გ. ალექსიძის ბალეტებში: კლიტემენსტრა („ორესტეა“), მედეა („მედეა“), ბახის „ჩაკონა“.

1988-90 წლებში მუშაობდა თბილისის ქორეოგრაფიული სასწავლებლის პედაგოგად.
1992-1994 წლებში იყო ბალეტმაისტერ გიორგი ალექსიძის ასისტენტი.

1994-2004 წლებში იყო თბილისის ოპერისა და ბალეტის სახელმწიფო თეატრის საბალეტო დასის გამგე.

1980 წელს მიენიჭა საქართველოს დამსახურებული არტისტის წოდება.

1987-97 წლებში მიწვეული იყო ტალინის, კიშინიოვის, ეკატერინბურგის, პერმის, ნოვოსიბირსკის, ალმა-ატის, ერევნის, დუშანბეს, კრასნოდარის ოპერისა და ბალეტის თეატრებში ბალეტმაისტერ-რეპეტიტორად.

2004 წლიდან თბილისის ოპერისა და ბალეტის სახელმწიფო თეატრის საბალეტო დასის პედაგოგ-რეპეტიტორია.