საქართველოს სახელმწიფო ბალეტი საგასტროლოდ ესტონეთსა და ფინეთში მიემგზავრება

2017 წლის  28 აპრილიდან  7 მაისამდე, კომპანია Eesti Konsert-ის ორგანიზებით ესტონეთის ქალაქ იიჰვიში ყოველწლიური საბალეტო ფესტივალი იმართება.  Eesti Konsert-მა  საქართველოს სახელმწიფო ბალეტი  ფესტივალში მონაწილეობის მისაღებად მიიწვია. ფესტივალის პროგრამა: 5 მაისი - მიხაილ  ფოკინის საღამო - „შოპენიანა“, „ვარდის ზმანება“ და „ფასკუნჯი“; 6 მაისი-ჯორჯ ბალანჩინის პროგრამა - „სერენადა“, „მოცარტიანა“ და იური პოსოხოვის  ერთმოქმედებიანი ბალეტი „საგალობელი“; 7 მაისი - გალა-კონცერტი. 

გასტროლი გაგრძელდება ფინეთში. ჰელსინკში საქართველოს სახელმწიფო ბალეტი  Saimaa Dance Festival–ის ხელმძღვანელმა და საბჭოს თავმჯდომარემ ჰანუ ჰიტინენმა (Hannu Hyttinen)  მიიწვია გასტროლზე. საბალეტო დასი  ორ წარმოდგენას 8 და 9 მაისს  გამართავს. პროგრამაშია იური პოსოხოვის „საგალობელი“, ჯორჯ ბალანჩინის „კონჩერტო ბაროკო“ და ფრედერიკ ეშტონის „მარგარიტა და არმანი” პრიმა-ბალერინა ნინო ანანიაშვილის მონაწილეობით. ორივე საღამო  ჰელსინკიში, Alexander Theatre-ში გაიმართება.